Неділя, 21 квітня 2019 13:27

Володимир Рошко. Што великдень про руснака

Володимир Рошко. Што великдень про руснака
«Што Великдинь про руснака» Автор і виконавець: Рошко Володимир Гаврилович — Vladimir Roshko

 

 

 

 

 

 

 

Зві́дайте лем у русна́ку,
Яки́й пра́зник їм у дя́ку
Ма́йбулше в души́ паде́ся?
Коли́ ра́дость рікốв ллє́ся?

Кіть не ка́ждый, бу́лше ї́х,
За Вели́кдень не на смі́х
Пуві́сть вам, і пра́вда се́.
Пра́зник сьись добро́ несе́.

Картинки по запросу великдень русини

Фа́йта ся ує́нно зы́йде,
Шốвдарь ї́сти час нады́йде.
Лі́пшого не зна́ву сма́ку,
Бо́жый дар се про русна́ку.

Вун є ца́рьом на́шых стра́в,
Тот спôку́йный, ко го ма́в.
По́зад дốвгого гôві́ня,
Прийшло́ Хри́ста воскресі́ня.

Од мало́го до старо́го,
Дочека́ли дня сято́го.
І до це́ркви з кошара́ми,
Іду́ть ці́лыма файта́ми.

По Сину́шнюй утіка́вуть,
Бо сохта́ш русна́цький зна́вуть:
Ма́йшікôвным ся возда́сть,
Гôпốдь їм сери́нчу да́сть.

Велико́дна в нас гости́на – 
Коли збе́реся роди́на.
Шốвдарь, па́ска на стôлі́,
Їме́ нись, гі кôрôлі́.

Сыр, пекни́ця, бура́к з хріном…
Ма́дяр бы пувів лем «Фі́ном».
Стул таки́й, што ця́пкать сли́на,
Раз на рук така́ гости́на.

Їсть ся, ву́п’єся вина́.
Воскресі́ня новина́,
Сла́виться на ра́дôсть на́м,
Пра́зник на́шым черева́м.

На Вели́кдень душа́ спі́вать,
Русна́к д сьо́го вôнь умлі́вать.
Ся́то ще лем ся зачи́нать,
Бо по сьо́му ся поли́вать.

Пе́ршый день – хло́пы діво́к,
Дру́гий – хлоп гі воробо́к,
Мо́крый з головы́ до ну́г,
Бы́ллють в по́стели, кіть лю́г.

 

Полива́вуться, квіля́ть,
Шлю́пкавуть і регоня́ть.
Над село́м сміх гі сула́к,
Так ся ба́вить наш русна́к.

Ся́тки ду́же гôлôсні́,
Та гі шốвдарь, фест масні́.
Чи́лядь сы́та і весе́ла,
Пудкарпа́тські на́ші се́ла
За два нны вôдốв залля́ті,
Ба́вляться на сьо́му ся́ті.

Гі чіко́вы, вадь телі́ці,
Ста́рьші, не лем молоді́ці
Ревучи́ біжу́ть село́м,
Ко керта́ми, ко дворо́м.

Ска́чуть ти і че́рез плу́т,
Хоть бы бôв коля́чий дру́т.
Та гі ốліні втіка́вуть,
Смівучи́ся, полива́вуть.

Фляшки́, ві́дра ще й пога́ры…
Чий урва́лися нись хма́ры.
І в топа́нках шлю́пкать во́да,
Полива́єме, не чко́да
А́ни а́нцук, ни віґа́н,
Мốкрі ґа́ті, кестема́н.

Та гі мо́кра мыш трясу́ться,
Полива́вуться, сміву́ться.
Ко бы збо́ку позера́в,
Рốзум бы му ся одня́в.

Ду́мав бы, ош воятя́ть,
Утопи́ти чий хотя́ть
Янно́ дру́гого. Ба чо́м?
На Слова́ках кербачо́м
У сьись день діво́к пічу́ть,
А русна́ки вốду ллю́ть.

Се гі по́топ сві́та, збо́ку – 
Чи́лядь ба́виться, нюврốку.
У русна́ку ни́ська ся́то,
Три́млють звы́чай сьись прокля́то.
Не сиди́, не позера́й, 
Бери́ гốрня, полива́й.

А кіть ді́вку не былля́ли,
Га́ньба – не почестова́ли.
Суха́ пста́ла молоди́ця,
Яка́ з не́ї оддани́ця?
Велико́дный сьись сохта́ш
В сві́ті лем єде́н – то на́ш.

ХРИСТОС ВОСКРЕС!

 

Медіа

Оцініть матеріал!
(0 голосів)


Переглядів: 296

Авторизуйтесь, щоб мати можливість залишати коментарі

Нагадуємо Вам, що редакція видання не несе відповідальності за зміст матеріалів, які розміщені користувачами сайту.
Реклама