Понеділок, 27 листопада 2017 19:47

А це вже не фігля: Володимир Рошко. НАША ПРАГА (на русинській мові)

А це вже не фігля: Володимир Рошко. НАША ПРАГА (на русинській мові)
Недавно на Фейсбуку смутно-весело писалося за Прагу, за наших руснаку, што там ідуть робити (файний віршик). Я вам хочу указати Прагу з мало иншого боку:


НАША ПРАГА


Сло́во Пра́га про русна́ка – 
Грі́є се́рце фа́йна дя́ка.
Гі геше́фт про шефтаря́,
Вадь горни́ць про друтаря́


З проіржа́вленов дірко́в.
Гро́ші в жеб тічу́ть ріко́в.
В Пра́гу ідеме́ роби́ти,
Би в доста́тку до́ма жи́ти.


В Пра́зі ро́биме гі му́ли,
Би ся ді́ти дубрі́ чу́ли,
І жона́ не наріка́ла,
Ста́ра би споку́йно спа́ла:


Зять на Че́хох зароби́в,
Фа́йту вбрав і накорми́в.
Нови́й мо́тор, нови́й плу́т,
Русна́к хлоп, а не кугу́т.


Од Маса́рика до ни́сь,
За робо́тов і не бли́сь,
В Пра́гу протопта́ли пу́ть,
И́йзрями русна́ки йду́ть.


Смі́хов, Гра́д і Вацлава́к,
Де не плю́неш, там русна́к.
Ту здоро́вля полиша́вуть,
Лем роби́ти, лем се зна́вуть.


На Руство́ думу́ прийшли́,
Жоні́ – гро́ші, і пушли́
Іза́сь в Пра́гу на робо́ту.
Закляло́ би сю бідно́ту.

Як там Пра́га? Як там жи́вуть?
Ци у У́нії не гни́вуть?
На се ка́жуть нам русна́ки,
Наполи́ уже́ пража́ки:

Картинки по запросу заробітчани у празі


Пра́га ва́риш веліче́зний,
А до чо́го паранне́зний.
Се не ха́ща, гі у на́с,
И́ншак там уті́кать ча́с.


Чи́лядь там споку́йна, си́та,
Пра́га чи́ста і уми́та.
Уночи́ світла́ горя́ть,
Жи́ти в Пра́зі – благода́ть.


Там зако́ни решпекту́вуть,
І не та гі в нас ґазду́вуть.
Дубрі́ ро́биш – вши́тко ма́єш,
Красно́ жи́єш і не зба́єш.


Не ловґу́вуть, не краду́ть,
З простака́ там кров не ссу́ть.
І честу́вуть там русна́ку,
Та гі ні́мцю ци поля́ку.


Там ся чу́да напозе́раш,
З то́го во́чі попроте́раш.
В Пра́зі и́ншак спочива́вуть,
Че́хи п’ють, а як гуля́вуть.


У госпо́ді ні́ґде сі́сти.
Пи́во ву́пити, ізі́сти,
По робо́ті субі́ при́йдуть,
Цімборо́ве ся ізи́йдуть.


Не рева́ти, пи́ски би́ти,
Че́хи ту іду́ть спочи́ти.
Сви́нські ко́ліна їдя́ть,
Тя́гнуть пи́во, хихоня́ть.


Се Євро́па, неборя́та,
Си́та, хоть і не бога́та.
Ци авто́бус, ци трамва́й,
При́йдуть и́ппен, хоть звіря́й


Ти годи́нку на руці́,
Так і ші́фа на ріці́.
Як на та́блі написа́ли,
Не споздя́ть, оби́ сь’те зна́ли.


У бовто́х уши́тко є́,
Бовта́ш ’д то́бі ся сміє́.
Перезві́дать і ука́же,
Вонь просте́литься, вонь ля́же.


Не наду́рить, запаку́є,
“Дя́куву” пуві́сть, честу́є.
Пра́га, бра́тте, то не хлі́в,
Чех не сви́нить там де ї́в.

Она́ до́кус не така́,
Та гі до́ма в руснака́.
Там на у́ряді почли́во,
Говоря́ть з тобо́в, на ди́во.


І не тре́ба пудплати́ти,
Па́пірь за́дарь мош зроби́ти.
Ту русна́ку бічалу́вуть,
Бо робу́тні, їх честу́вуть.


Як пуві́ли – заплати́ли,
Здо́гадавуть, што сь’ме жи́ли
У Респу́бліці янну́й.
Се тубі́ не ни́шньий гну́й.


Поліца́йти там почли́ві,
Помага́вуть, не ліні́ві.
Заблуди́вісь – путь ука́жуть,
А не на́рас тя поя́жуть.


Пра́га – то не пи́ссьий хву́ст,
Пе́ла не́ї село́ – Ху́ст.
В Пра́гу ни́ська ле́гко пу́йдеш,
На орса́ґ коли́ не ву́йдеш,


З Ра́хова і із Ірша́ви,
З До́вгого, вадь із Сваля́ви
Фурт авто́буси іду́ть.
Тра́фиш там, споку́йний бу́дь.

 

Пра́га, та гі фа́йна кво́чка.
То не бай, чи́я соро́чка,
Ко́тра бли́жа юй до ті́ла.
Пра́га вши́тких би пригрі́ла.


Тя́гне руснака́ у Пра́гу,
Не іде́ там пи́ти збря́гу.
Пороби́ти, зароби́ти,
Житя́ ді́тьом налади́ти.


Не дої́сть і не доспи́ть,
Там пуд пло́том не лежи́ть.
Чиляди́нов в Пра́зі чу́є,
Думу́ при́йде і бану́є.


Як дубрі́, што Пра́га є́,
Зароби́ти ся дає́.
Чом там чи́сто, чом красно́?
Думу́ ве́рташся в багно́.


Пра́га, гі ґумо́вий мі́х,
При́йме до́рос нас усі́х.
Лем не сви́ньтеся, іді́ть,
Жи́йте, вчі́ться і робі́ть.

 

Пра́га – се т’ти не село́,
Сні́гом ю не замело́.
Бо́ла Пра́га нам столи́цьов,
Ни́ська з го́лов ми гузи́цьов,


Ідеме́ там зароби́ти
І культу́рі ся учи́ти.
Она́ две́рі утворя́є,
Руснако́ви помага́є.


Да́як ся прогодова́ти,
Жебрака́ми не опста́ти.
Не лем ко́рмить, Пра́га у́чить,
Гру́шми діточо́к не му́чить.


Ка́рлув університе́т – 
Про русна́ка, та гі ме́д.
За́дарь ту дипло́м дуста́не,
У Євро́пі вче́ним ста́не.


Ка́зці сюй прийшо́в кони́ць,
Ма́єш цу́равий горни́ць.
Як ся вши́тко поміня́ло,
Че́хами ся будова́ло


В У́жгороді Ґалаґо́в .
В Пра́гу нись русна́к прийшо́в,
Ї́хньий ва́риш будова́ти.
Прийшо́в час довги́ верта́ти.

Володимир Рошко

Оцініть матеріал!
(18 голосів)


Переглядів: 1416

Авторизуйтесь, щоб мати можливість залишати коментарі

Нагадуємо Вам, що редакція видання не несе відповідальності за зміст матеріалів, які розміщені користувачами сайту.
Реклама