Неділя, 26 листопада 2017 15:42

Русинська фігля: Володимир Рошко. НАСІЯЛА АНЦЯ МАКУ

Русинська фігля:  Володимир Рошко. НАСІЯЛА АНЦЯ МАКУ
 Насі́яла А́нця ма́ку, Бо дуста́ла таку́ дя́ку – Галушо́к із ма́ком ї́сти, Не пілу́вучися сі́сти.

 

 

 Насі́яла А́нця ма́ку,

Бо дуста́ла таку́ дя́ку

– Галушо́к із ма́ком ї́сти,

Не пілу́вучися сі́сти.

 

Ми́су спе́ред ся покла́сти,

Зачало́ вонь А́нцьов тря́сти.

На́ремно ’ю забажи́ло,

Гіби́ в зад заби́ли ши́ло.

 

Закорті́ло ба́ник з ма́ком,

Потягло́ діто́чим сма́ком.

Здо́гадала сво́ю ма́мку,

І діто́чу забага́нку,

 

 

З ма́ком галушо́к горни́ць,

Як обли́зує ути́ць

Із денця́ соло́дкий ма́к,

Пстав голо́ден небора́к.

 

Горни́ць тот спе́ред вочи́,

Сто́йить юй ще й уночи́.

Ді́ти галушки́ стрепа́ли,

Ще й варі́ху облиза́ли.

 

Ма́мці з ня́ньком опста́в фу́ч,

В че́реві бурчи́ть на ну́ч.

Мак зийшо́в, уже зацві́в,

Заяза́вся і дозрі́в.

 

Час прийшо́в його́ збира́ти,

Грум із не́ба! Бо́жа ма́ти!

Две́рі раз ся проломи́ли,

З ре́ваньом, гіби́ їх би́ли,

 

Міліці́шту реґеме́нт,

По́вна хи́жа пуд моме́нт.

Ста́ру А́нцю убали́ли,

Пушки́ на ню налади́ли.

 

Ста́рший ме́жи них зрича́в,

Про нарко́тики зача́в.

На́мудро штось лопони́ть,

А́нцю тварь ціла́ боли́ть.

 

Бо упе́рта ньов у ді́лі,

Міліці́шти ду́же смі́лі.

Нахили́лися над ба́бов,

Та гі бу́зьки спе́ред жа́бов.

 

Ста́рший це́йдулов трясе́,

Дурни́м з ньо́го вонь несе́.

За “прито́н” уго́лос ло́пнув,

Ме́жи ре́бра А́нцю ко́пнув.

 

Ро́зказ дав ’ю пояза́ти,

Ба́бі ка́же мак вказа́ти.

Тя́гнуть А́нцю у грядки́,

Ме́жи кру́мплі, лопатки́.

 

Спе́ред ни́ма росте́ ма́к,

Ста́рший – и́ппен гі бура́к.

Зчи́рвінів, і вонь упрі́в,

За “прито́н” іза́сь пуві́в.

 

Ву́микати до стебла́!

– Зву́зив во́чі, гі в козла́,

Міліці́штум розказа́в,

Як деми́чуть, позера́в

 

. Да́ле ся іми́в за А́нцю,

Не гі ґавалі́рь до та́нцю.

А́нцю тя́гнуть у райо́н,

Гріх розду́ли, гі бало́н.

 

Будеме́ тебе́ суди́ти!

В ла́ґрови даме́ погни́ти!

Мак, нарко́тики, прито́н!

Ба́бі вка́зувуть зако́н.

 

Масні́ пи́ски до́вкул А́нці,

Не буду́ть із сьо́го та́нці.

Юй злоді́йство приписа́ли,

Ще й яко́є, би ви зна́ли.

 

Го́рше, гі кого́сь заби́ти,

Се́ґинь А́нця, што роби́ти?

У пивни́цю ба́бу ве́лли,

Две́рі з жи́ліза запе́лли.

 

Ко́ло две́ри міліці́шта,

Із се́ла, неду́йдош Пі́шта.

Спе́ред А́нці дали́ ми́ся,

З поми́ями – удави́ся.

 

Се не галушки́ із ма́ком,

Із забу́тим да́внім сма́ком.

Зра́на па́нство засіда́є,

У зако́ни позера́є.

 

Наркома́нку час навчи́ти,

Як дурма́н в грядка́х сади́ти.

Суд зобра́ли пуд кліп во́ка,

Про пану́ – то не моро́ка.

 

Біру́в з па́піря чита́є,

Справедли́вий суд кара́є.

Як зако́ном не крути́ли,

Ба́бі А́нці присуди́ли:

 

Штраф за гріх її дати́,

Вонь три пи́нзії зняти́.

Чоло́ в си́нцьох, гу́ба зду́та,

Сто́йить А́нця попухну́та.

 

Мак, пропа́в би, ву́йшов бо́ком,

І сине́ць пуд лі́вим во́ком.

А́нці до́рого бийшло́ся,

Най би уже́ закляло́ся.

 

З ма́ком ї́сти галушки́

– Мо́же да́кому смішки́.

Юй, бізо́вно, не до смі́ху,

Те́пші гет, і вон варі́ху.

 

Вже за мак не хо́че чу́ти,

Си́та ним, мош ся іззу́ти.

Лі́пше бро́взи ся напи́ти,

А не ма́коші люби́ти.

 

Мак не сло́бунно, не смі́єш!

Кіть про ї́діня посі́єш,

У тюрьму́ тя запаку́вуть,

Наркома́нію розду́вуть.

 

Мак, за ньо́го ти забу́дь,

Вун веде́ на грі́шний пу́ть.

Лю́биш мак – ти наркома́н

– Ка́же так дурни́й Іва́н.

 

И́ппен се зако́н наш пи́ше,

Ка́ждий че́кать, коли́ зди́ше.

З ма́ком ба́ник, галушки́,

За них пи́шуть лем книжки́.

 

Мак про чи́лядь заказа́ли,

Ми без ма́кошу ся пста́ли.

Тот, ко ни́ська лю́бить ма́к

– Сеґіни́ско, небора́к,

 

Запали́ть за ма́ком сві́чку,

Наруби́ ізді́є трі́чку.

Би ся світ переверну́в,

Би ся мак од нам верну́в

Володимир Рошко

 

 

Володимир Рошко читає свої фіглі на Міжнародному русинському фестивалі "Червена Ружа трояка". Мукачево. 28.10.2017

Оцініть матеріал!
(3 голосів)


Переглядів: 652

Авторизуйтесь, щоб мати можливість залишати коментарі

Нагадуємо Вам, що редакція видання не несе відповідальності за зміст матеріалів, які розміщені користувачами сайту.
Реклама